د کابل د ایرنا خبري اژانس د خبریال د راپور له مخې؛ د افغانستان د سرپرست حکومت د بهرنیو چارو وزارت د ویاند مرستیال حافظ ضیا احمد د چهارشنبې په ورځ د غويي په ۳۱ مه په یوه خبرپاڼه کې اعلان وکړ چې د دغه وزارت سرپرست مولوي امیر خان متقي نن په پیکن کې د چین د بهرنیو چارو وزیر وانګ يي سره ولیدل.
په دې ناسته کې دواړو لورو د دوه اړخیزو اړیکو او اقتصادي همکاریو د پراختیا په اړه خبرې وکړې.
مولوي امیرخان متقي چین د افغانستان یو مهم اقتصادي شریک وباله او هیله یې څرګنده کړه چې په نږدې راتلونکي کې به د دواړو هېوادونو ترمنځ د سوداګرۍ کچه د پام وړ کچې ته ورسیږي.
هغه زیاته کړه: باید د ټولو هغو ستونزو لپاره یوه هراړخیزه حل لار وموندل شي چې افغان سوداګر د کرنیزو محصولاتو او نورو توکو د صادراتو پر مهال ورسره مخ کیږي.
مولوي امیر خان متقي د افغانستان او چین ترمنځ د اقتصادي همکاریو د پراختیا په برخه کې خپل عملي وړاندیزونه وړاندې کړل، په شمول د ترانسپورت، بانکي اړیکو او سوداګریز توازن په برخه کې، او د ګډو بین الحکومتي کمیسیونونو د اقتصادي همکاریو د لا پراختیا او تخنیکي بحثونو لپاره د همکارۍ غوښتنه یې وکړه.
د بهرنیو چارو سرپرست وزیر یو ځل بیا ټینګار وکړ چې د افغانستان خاوره به هیڅکله د ګاونډیو پر ضد ونه کارول شي.
وانګ يي په دې لیدنه کې ژمنه وکړه چې چین به له افغانستان سره خپلو سیاسي او اقتصادي مرستو ته دوام ورکړي او هڅه به وکړي چې د کرنیزو محصولاتو او نورو افغاني وارداتو د صادراتو پر وړاندې خنډونه لرې کړي.
هغه زیاته کړه: چین به د یو ښه ګاونډي په توګه هیڅکله د افغانستان په اقتصادي ودې کې له همکارۍ څخه ډډه ونه کړي.
د خبر پایله.
Your Comment