اخندزاده: پروژې باید په شفاف ډول د خلکو لومړیتوبونو ته په پام سره پلې شي

کابل کې د ایرنا خبري آژانس د خبریال په خبره؛ د افغانستان د سرپرست دولت د کلیوپراختیا او بیا رغوونې وزارت مسوولینو نن دوشنبې د وري ۱۳ مه په یوه خبرپاڼه کې ویلي، د دغه وزارت سرپرست ملا محمد یونس اخندزاده په افغانستان کې د ملګرو ملتونو د ځانګړي استازي له مرستیال اندریکا راتوتي سره د لیدنې خبر ورکړی دی.

په افغانستان کې د ملګرو ملتونو د سرمنشي ځانګړي استازي مرستیال د خپلو فعالیتونو په اړه راپور وړاندې کړ او ویې ویل: د کلیو د بیارغونې او پراختیا وزارت یو مهم او سکتوري وزارت دی چې په کلیوالي سیمو کې د پروژو په تطبیق کې مهم رول لري او موږ غواړو بشردوستانه مرستې د پراختیایي پروژو د تطبیق په لور حرکت وکړو.

اندريکا راتوتي د مهمو پروژو په ځانګړې توګه د اوبو لګولو په برخه کې د وزارت له همکارۍ څخه مننه وکړه او زياته يې کړه چې موږ پلان لرو له وزارت سره د اوبو رسولو په برخه کې لا زيات کار وکړو.

په دې کتنه کې د کلیو بیارغونې او پراختیا وزارت سرپرست ملا محمد یونس اخندزاده وویل: د پراختیايي پروژو تطبیق یو مهم او بېړنی ګام دی او باید بنسټیزو پروژو ته د بشري مرستو په پرتله لومړیتوب ورکړل شي.

اخندزاده زياته کړه: زموږ دنده دا ده چې د خلکو لومړيتوبونه په نظر کې ونيسو او پروژې په شفاف او ښه کيفيت سره پلې کړو، ترڅو خلک ترې په دوامداره توګه ګټه پورته کړي.

د پیغام پای/