د فراه ولایت د خراسان جنوبي لپاره یوه ستراتیژیکه موقع ده/ د ماهیرود پوله د دواړو هېوادونو د اقتصاد د ملا تیر دی

د کابل سخه د ایرنا خبري اژانس د خبریال د راپور له مخې؛ د خراسان جنوبي ولایت والي سید محمد رضا هاشمي د شنبې په ورځ د غبرګولي په ۱۰مه نېټه مازیګر د فراه ولایت له والي مولوي غوث الدین سره په کتنه کې د دواړو ګاونډیو ولایتونو ترمنځ د دوه اړخیزو اړیکو پر پراختیا ټینګار وکړ او ویې ویل: د فراه ولایت د خراسان جنوبي لپاره یوه ستراتیژیکه موقع ده او خامخا باید له شته ګډو ظرفیتونو څخه په غوره توګه کار واخیستل شي.

هغه د دواړو ملتونو دیني، کلتوري او جغرافیایي مشترکاتو ته په اشارې سره زیاته کړه: د ایران اسلامي جمهوریت او افغانستان ژورې او ریښې لرونکې مشترکات لري او دا مشترکات کولای شي د اقتصادي، علمي او کلتوري همکاریو د پراختیا لپاره مناسب بستر وي.

د خراسان جنوبي والي د دواړو ولایتونو ترمنځ د سوداګریزو اړیکو د پام وړ ودې خبر هم ورکړ او ویې ویل: یوازې د سږ کال په لومړیو دوو میاشتو کې له افغانستان څخه واردات د ارزښت له مخې ۲۲۸ سلنه او د وزن له مخې ۳۳۵ سلنه زیات شوي دي.

د هغه په وینا، له افغانستان سره د ایران د صادراتو له ۳۸ سلنې څخه ډیر د ماهیرود له لارې ترسره شوي چې دا په اقتصادي راکړو ورکړو کې د دې پولې اهمیت ښیي.

هغه د ماهیرود پوله د دواړو هېوادونو د اقتصاد د ملا تیر وباله او زیاته یې کړه: پخوا د دې پولې فعالیت تر مازیګر ۵ بجو پورې محدود و، خو اوس د کاري ساعتونو په زیاتوالي سره تر ۱۱ بجو پورې، موږ هره ورځ له دې پولې څخه د ۳ زرو څخه د زیاتو کسانو د تګ راتګ شاهدان یو.

هاشمي د ماهیرود په سرحدي بازار کې د ۱۷ زرو میلیاردو ریالو څخه د ډیرې پانګونې خبر ورکړ او ویې ویل: د زیربناوو په ۱۰۰ سلنه بشپړیدو سره، اوس د سوداګرۍ، روغتیا سیاحت او علمي او پوهنتوني همکاریو د پراختیا لپاره مناسبه موقع برابره شوې ده.

هغه د دواړو ولايتونو تر منځ د ښه سړک د جوړولو لپاره د ترسره شويو پلانونو يادونه وکړه او ويې ويل:  د ماهیرود – فراه د سړک پروژه چې کلونه معطله وه، د ولسمشر په لارښوونه او د سړک او ښار جوړونې وزارت په تعقیب په لومړیتوب کې راغلې او په پلي کیدو ده.

د خراسان جنوبي والي د کرنې، کانونو د پروسس، نوي کیدونکو انرژیو، پوهنې پر بنسټ، کور جوړونې او روغتیا سیاحت په برخو کې د بشپړې همکارۍ لپاره د دې ولایت چمتووالی هم اعلان کړ او زیاته یې کړه: اوس مهال په دې ولایت کې ۸۵۸ میګاواټه لمریز بریښنا تولیدیږي او د دورو سیمه د ۲۰۰۰ میګاواټو څخه د ډیر ظرفیت لرونکي بادي بریښنا فابریکې د جوړولو وړتیا لري.

هاشمي په پای کې د دواړو ملتونو ترمنځ د یووالي او خواخوږۍ پر پیاوړتیا ټینګار وکړ او ویې ویل: دښمنان هڅه کوي کوچني اختلافات لوی وښیي، خو موږ باید په مشترکاتو په تمرکز سره د ستراتیژیکو، اقتصادي او کلتوري همکاریو یو نوی فصل پیل کړو.

خبر پای/