د ایرنا خبري اژانس د خبر له مخې، د افغانستان د سرپرست حکومت د بهرنیو چارو وزارت سرپرست مولوي امیرخان متقي نن یکشنبه د غويي ۲۸مه د "تهران د خبرو اترو فورم" په غونډه کې وویل: افغانستان یو اسلامي هېواد دی او داسې هېواد دی چې په تېرو ۵۰ کلونو کې یې ډېر نظامونه تجربه کړي دي.
هغه زیاته کړه: د افغانستان اسلامي امارت یو متوازن او اقتصاد محوره سیاست غوره کړی دی او ګاونډي هېوادونه د افغانستان په سیاست کې ځانګړی ځای لري. دا نظام چې نن رامنځته شوی، له ډېرو تجربو او هغو نسخو وروسته رامنځته شوی چې له بهره د افغانستان پر خلکو تحمیل شوې او پایله یې نه درلوده.
نن په افغانستان کې داسې نظام رامنځته شو چې په سر کې یې امیر او بیا د وزیرانو رئیس دی او کابینه شتون لري. ۳۴ ولایتونه لرو او شورا لرو چې د خلکو غږ واورو. په دې برخه کې بریالي یو.
د متقي په وینا، په تېرو څلورو کلونو کې مو وکولی شو د متوازن سیاست په چوکاټ کې له ګاونډیو، سیمې او له سیمې بهر هېوادونو سره ښې اړیکې ولرو، په ځانګړې توګه په اقتصادي برخه کې. له ایران سره ۳ میلیارده ډالر سوداګري لرو.
د بهرنیو چارو وزارت سرپرست څرګنده کړه: افغانستان په تېرو څلورو لسیزو کې په ټولو برخو کې له متوازن سیاست څخه برخمن نه و او ډېرو د یو ځواک او هېواد د خوښۍ لپاره له یو بل سره دښمني کوله. په تېرو څلورو کلونو کې مو وکولی شو د بهرني سیاست په برخه کې متوازن سیاست په ښه توګه پرمخ یوسو او د سیمې او له سیمې بهر هېوادونو ته ورځ تر بلې نږدې کېږو.
مولوي امیرخان د خپلو خبرو په یوه برخه کې وویل: ایران او افغانستان دواړه د نشه يي توکو او وچکالۍ له ستونزو سره مخ دي. کله چې وچکالي نه وي، هر څومره اوبه چې وي، ایران ته به بهېږي. زموږ هڅه دا ده چې اوبه ضایع نه شي او په ښه توګه ایران ته ورسېږي. په دې برخه کې زموږ شرعي او اسلامي مسؤلیت دی چې مرسته وکړو او دا کار هم ثواب او هم د ښه سیاست په توګه ګڼو.
د ایران خلک چې زما غږ اوري، شک ونه کړي چې موږ په دې برخه کې بد نیت نه لرو.
متقي کابل ته د ایران د بهرنیو چارو وزیر وروستي سفر ته په اشارې سره وویل: د دې سفر په ترڅ کې د افغانستان د وزیرانو رئیس ښاغلي عراقچي ته وویل: موږ دا خپل مسؤلیت ګڼو چې د سیستان او بلوچستان تږو خلکو ته اوبه ورسوو او دا زموږ سیاست دی. که د هلمند تړون هم نه وای، موږ په دې ژمنه ولاړ وو.
د خبر پایله.
Your Comment