په کابل کې د ایرنا خبري آژانس د خبریال په وینا، د افغانستان د سرپرست حکومت د عامې روغتیا سرپرست وزیر مولوي نور جلال جلالي نن چهارشنبه د کب په ۷ مه په کابل کې د چین له سفیر جاوه شنګ سره وکتل.
په دې کتنه کې د کابل ملي روغتون لپاره د تجهیزاتو برابرېدو، د سنتي طب برخه کې د انسټېټیوټ جوړېدو او په کندهار کې د میرویس سیمه ییز روغتون پراختیا او بیا رغونې اړوند بحث او خبرې ترسره شوې.
همداراز جلالي د روغتیايي سیسټم پياوړتیا لپاره د روغتیايي کارکوونکو ظرفیت لوړول، د دې برخې پراختیا او په تجهیزاتو د روغتونونو سمبالېدل اړین وبلل او په همدې موخه یې د چین له سفیر څخه د میرویس سیمه ییز روغتون بیا رغونې او پراختیا، د کابل ملي روغتون لپاره د تجهیزاتو او سنتي طب برخه کې د انسټېټیوټ جوړېدو غوښتنه وکړه.
د چین سفیر خپلو دوامداره همکاریو ته په اشارې د میرویس سیمه روغتون بیا رغونې او پراختیا، روغتیایي کارکوونکو د ظرفیت لوړولو، اړینو تجهیزاتو او درملو برخه کې د بشپړې همکارې ډاډ څرګند او ویې ویل، په نږدې راتلونکې کې به روغتیا وزارت سره د ګډې همغږۍ له لارې د میرویس سیمه ییز روغتون د بیا رغونې او پراختیا چارې پیل شي.
د ایرنا د خبر له مخې، د افغانستان د عامې روغتیا وزارت سرپرست کابو څلور میاشتې مخکې چین ته د خپل سفر په ترڅ کې له افغانستان سره د سنتي طب په برخه کې د دغه هیواد د همکارۍ غوښتنه وکړه.
د پیغام پای/
Your Comment