په کابل کې د ایرنا د خبری آژانس د خبر له مخې، نن د تله د میاشتې په ١٦ مه نیټه د افغانستان د سرپرست حکومت د کرنې، اوبولګولو او مالدارۍ وزیر مولوی عطاء الله عمری، د ایران د اسلامی جمهوریت له یوه پلاوی سره وکتل.
په دې کتنه کې د دواړو هېوادونو چارواکو د کرنې او مالدارۍ په برخو کې د دوه اړخیزو همکاریو د پیاوړتیا په اړه د نظر تبادله وکړه.
د ایران په پلاوي کې چې مشري یې د سیستان او بلوچستان والي محمد کرمي کوله د والي سیاسي او امنیتي مرستیال علیرضا مرحمتي، د اقتصادي همغږۍ مرستیال داود شهرکي، د ودانیزو چارو مرستیال منصور بیجار، د ایران د پارلمان غړو محمد سرګزي او فرهاد شهرکي او په کابل کې د ایران د سفارت مرستیال غلامرضا نجاري شامل و. د کرنې د جهاد سازمان رییس علیرضا دهمرده او د ایران د کرنې وزارت سلاکارانو هم په دې ناسته کې حضور درلود.
په دې کتنه کې دواړو لورو د کرنې، مالدارۍ، د خوراکي توکو د صادراتو او وارداتو، د افغانستان د کرنې وزارت د کارکوونکو پر روزنې او د ګډې پانګونې په برخو کې د دوه اړخیزو همکاریو پر پراختیا ټینګار وکړ.
مولوي عطاء الله عمري ايراني پلاوي ته د ښه راغلاست په ترڅ کې د کرنې او مالدارۍ په برخو کې د ايران پرمختګونه ياد کړل او هيله يې څرګنده کړه چې افغانستان د ايران له علمي او تخنيکي لاسته راوړنو او تجربو څخه ګټه پورته کړي. هغه دغه راز د دغو همکاريو د تحقق لپاره په راتلونکي کې د عملي ګامونو په پورته کولو ټينګار وکړ.
همدارنګه ایراني پلاوي افغانستان ته د خپل سفر موخه د کرنې او مالدارۍ په بېلابېلو برخو کې د متقابلو همکاریو پیاوړتیا، افغان محصلینو ته د تحصیلي بورسونو برابرول او د محصولاتو د صادراتو او وارداتو زیاتوالی اعلان کړ.
هغوی همدارنګه په کب نیونه، کرنه، بڼوالۍ، د پرمختللو لابراتوارونو جوړولو او د څېړنیزو فارمونو په برخه کې د ایران لاسته راوړنې یادې کړې او په دې برخو کې یې د همکاریو لپاره خپل چمتووالی څرګند کړ.
په پای کې د افغانستان د کرنې وزیر د ایران د پخوانیو همکاریو قدرداني وکړه او په ټولو برخو کې یې د همکاریو د پراختیا لپاره د خپل هېواد پر چمتووالي ټینګار وکړ.
د پیغام پای/
Your Comment