کابل کې د ایرنا خبري آژانس د خبریال په خبره؛ د افغانستان د سرپرست دولت ارګ یکشنبې ماښام د چنګاښ ۱۰ مه په یوه خبرپانه کې د هېواد د یو شمېر علماوو او قومي مخورو سره د سیاسي مرستیال مولوي عبدالکبیر د لیدنې خبر ورکړی دی.
قومي مشرانو او علماوو له اسلامي امارت سره د خپلو همکاریو او ملاتړ ډاډ ورکړ زیاته یې کړه، چې ولس د اسلامي نظام ثبات او دوام، اقتصادي پیاوړتیا او یو سوکاله افغانستان غواړي، چې یوازې د اسلامي امارت په حاکمیت کې ممکن دی.
په دې کتنه کې د سرپرست دولت سیاسي مرستیال مولوي عبدالکبیر وویل: اسلامي امارت د هېواد د پرمختګ لپاره قوي اراده لري او د هېواد پرمختګ د ټولو ګډې همکارۍ ته اړتیا لري.
د افغانستان د سرپرست دولت دغه چارواکی د خلکو او حکومت ترمنځ د همکارۍ او همغږۍ پر پیاوړتیا ټینګار وکړ.
د پیغام پای/
Your Comment