د ایرنا خبري اژانس د راپور له مخې؛ د ایران د پارلمان د ملي امنیت او بهرنۍ پالیسۍ د کمېسیون ویاند ابراهیم رضایي د یکشنبې په ورځ د غبرګولي په ۴مه خبریالانو ته د دغه پارلمان د ملي امنیت او بهرنۍ پالیسۍ د کمېسیون د غونډې په اړه، چې د بهرنیو چارو وزیر سید عباس عراقچي په کې ګډون درلود، معلومات ورکړل او ویې ویل: عراقچي په دې غونډه کې د اسلامي جمهوریت ایران او د امریکا متحده ایالاتو ترمنځ د غیر مستقیمو خبرو اترو او د خبرو اترو د پنځم پړاو په اړه کمېسیون ته راپور وړاندې کړ.
هغه زیاته کړه: د بهرنیو چارو وزیر ټینګار وکړ چې اسلامي جمهوریت ایران تر فشار لاندې خبرې نه کوي او زموږ ډیپلوماسي په هوښیارانه او یوازې د اټومي موضوع په اړه روانه ده، ځکه چې د اسلامي جمهوریت ایران پالیسي روښانه ده او تر فشار، ګواښ یا لالچ لاندې نه راځي.
د ایران د پارلمان د ملي امنیت کمېسیون ویاند څرګنده کړه: د بهرنیو چارو وزیر په ایران کې د یورانیمو د غني کولو سره د صهیونیسټي رژیم مخالفت ته هم اشاره وکړه او ویې ویل: که په سیمه کې جګړه ونښلي، ټول هېوادونه به زیانمن شي او ټوله سیمه به تر اغېز لاندې راشي.
رضایي زیاته کړه: عراقچي هغو وړاندیزونو ته اشاره وکړه چې په خبرو اترو کې مطرح شوي وو او ویې ویل چې موږ د سیمه ییز غني کولو له مرکز څخه هرکلی کوو، خو په هېواد کې دننه باید غني کول دوام وکړي.
هغه په دې بیانولو سره چې د بهرنیو چارو وزیر په وینا، اسلامي جمهوریت ایران هېڅکله د خبرو اترو میز نه دی پرېښی او ډیپلوماسي ته دوام ورکوي، وویل: د ایران د بهرنیو چارو وزیر د "اسنپ بیک" میکانیزم او د ماشه میکانیزم د فعالولو په اړه د ځینو ګواښونو په ځواب کې وویل چې که دا میکانیزم فعال شي، زموږ غبرګون به سخت وي.
د ایران د پارلمان د ملي امنیت کمېسیون ویاند زیاته کړه: د ملي امنیت کمېسیون غړو هم د خبرو اترو په اړه خپل نظرونه څرګند کړل او ځینو غړو ټینګار وکړ چې له امریکا سره خبرې اترې بې ګټې دي او په کلکه یې پر هغو بندیزونو نیوکه وکړه چې امریکایانو له خبرو اترو سره په یو وخت پر ایران لګولي دي.
رضایي روښانه کړه: ځینو غړو د خبرو اترو پر بې ګټې والي ټینګار وکړ او ویې ویل چې د بهرنیو چارو وزارت باید د خبرو اترو ترڅنګ نورو دندو او کارونو ته هم پام وکړي.
د خبرپایله.
Your Comment