په کابل کې د ایرنا خبري آژانس د خبریال له مخي، د افغانستان د سرپرست حکومت د اقتصاد وزارت چارواکو نن پنجشنبه د تله ۵ مه په یوه خبرپاڼه کې ویلي، چې د دغه وزارت سرپرست قاری دین محمد حنیف په کابل کې د یوناما د پلټنې له مشرې مېرمن سریلات سره د لیدنې کړي دی.
په دې کتنه کې دواړو لورو په افغانستان کې د یوناما د پروګرامونو او د ملګرو ملتونو د دفترونو د ارزونې په اړه خبرې وکړې.
د اقتصاد وزارت سرپرست په افغانستان کې د ملګرو ملتونو سازمان د فعالیتونو د هرکلي ترڅنګ، د بشري مرستو پر دوام ټینګار وکړ، د ملګرو ملتونو ادارې او ملاتړي بنسټونه دې د پراختیایي همکاریو او د مسلکي او د کارموندنې د پروګرامونو د متوازن تطبیق په برخه کې د تمرکز غوښتنه وکړه.
د اقتصاد وزارت سرپرست د افغانانو د کنګل شوې بهرنۍ پانګې خلاصون او د مالي او بانکي بندیزونو لرې کول د هېواد د اقتصادي ثبات او د خلکو د اقتصادي ستونزو د حل لپاره مهم وبلل او په دې برخه کې یې د ملګرو ملتونو سازمان مسوولانه اقدام غوښتنه وکړه.
د ایرنا په وینا، امریکا په افغانستان کې د خپلې شرمونکې ماتې د جبرانولو په موخه د افغانانو د بهرنیو اسعارو له ۹ میلیاردو ډالرو څخه زیاتې زېرمې بندې کړې.
د پیغام پای/
Your Comment