په کابل کې د ایرنا خبري آژانس د خبریال له قوله، د افغانستان د سرپرست حکومت د ملي دفاع وزارت چارواکو نن یکشنبه د وږی د ۲۵مې نېټې په سهار د هوايي ځواک د درېیو پیلوټانو د فراغت او د هوايي دفاع په پوهنتون کې د ۱۲۰ تنو نویو ځوانانو د استخدام اعلان وکړ.
خبرځاى زياته کړه: درې تنه مجاهد پيلوټان د ملي دفاع وزارت د هوايي ځواک او هوايي دفاع له پوهنتون څخه د مسلکي، نظري او عملي روزنيزو کورسونو له بشپړولو وروسته د يو لړ مراسمو په ترڅ کې چې د لوى درستيز قاري محمد فصيح الدين فطرت، د کورنیو چارو سرپرست وزیر سراج الدین حقاني، د قومونو او سرحدونو وزارت سرپرست ملا نورالله نوري، د لوړو زده کړو سرپرست وزیر ندا محمد ندیم او د ملي دفاع وزارت سرمفنش په ګډون جوړه شوي وه، په بریالیتوب سره یې خپلې عملي الوتنې بشپړې کړې او فارغ شول.
د کورنیو چارو وزارت سرپرست په دې مراسمو کې وویل: الحمدلله زموږ هوايي ځواکونه ورځ تر بلې په خپلو کارونو کې خپلواکه کېږي، تاسو باید هڅه وکړئ چې خپله روزنه په سمه توګه ترسره کړئ او هېڅکله مه هېروئ، له خپلو هېوادوالو سره مرسته وکړئ او متحد اوسئ.
هغه زیاته کړه: هغه پیلوټان چې بهرنیو هېوادونو ته تللي دي، موږ هغوی ته خپلې وسلې خلاصې کړي او هغوی کولای شي چې هېواد ته راستانه شي او د خپلو هېوادوالو خدمت وکړي.
لوي درستیز هم دغو پیلوټانو ته په خطاب کې وویل: په تېرو شلو کلونو کې ځینو افغانانو په اشتباه وه او هېواد یې تر اشغال لاندې وه، د اسلامي امارت مشر یې بښنه وکړه، نن زموږ هر هېوادوال دلته خدمت کولای شي چي هیواد په خپلو پښو ودریږي.
هغه څرګنده کړه: په تيرو وختونو کې زموږ د هيواد د وروسته پاتې والي اصلي علت اشغال و. زموږ پوځ په رښتیني ډول د هېواد ساتنه کوي او موږ هڅه کوو چې خپل هېوادوال ارام ژوند ولري.
د پیغام پای/
Your Comment