بهر مېشتي افغانان دې بېرته راشي او د هېواد آبادۍ کې د برخه واخلي

کابل کې د ایرنا خبري آژانس د خبریال په خبره؛ د افغانستان د سرپرست دولت د حج او اوقافو وزارت مسوولینو نن پنشنبې د وري ۳۰ مه په خپله اېکس پاڼه له یو شمېر بهر مېشتو افغان علمي او فرهنګي شخصیتونو سره د دغه وزارت د سرپرت مولوي نور محمد ثاقب د لیدنې خبر ورکړی دی.

په دغه لیدنه کې مولوي نور محمد ثاقب ویلي، چې افغانستان د ټولو افغانانو ګډ کور دی او له ټولو بهر مېشتو افغانانو غواړي بېرته وطن ته راشي او د هېواد په بیارغونه او آبادۍ کې برخه واخلي.

 ثاقب زیاته کړه: په هېواد کې اسلامي نظام، عدالت، انصاف او ملي امنیت تامین شوی او د هېواد ابادي، د اقتصادي ثبات ټینګښت او د هېوادوالو لپاره د لازمو اسانتیاوو رامنځته کول د اسلامي امارت دنده او دنده ده او په دې برخه کې له هېڅ ډول هڅې درېغ نه کوي.

د ده په وینا د اسلامي امارت مسؤلین د اداري فساد د له منځه وړلو او خپلو ګرانو هېوادوالو ته د معیاري او غوره خدمتونو وړاندې کولو ته پوره ژمن دي.

خوشال روهي د یو شمېر نورو د مېلمنو او علمي شخصیتونو په استازیتوب خبرې وکړې ویې ویل: د ویاړ ځای دی چې اسلامي امارت په خپلو مالي منابعو لویې اقتصادي پروژې پیل کړې، د واک انحصار او اداري فساد یې له منځه وړی دی.

دغه راز دوی په هېواد کې د امنیت د تامین، د نشه یي توکو د مخنیوي، د لویو پرمختیايي پروژو د پلي کېدو او په بېلابېلو برخو کې د اسلامي امارت د لاسته راوړنو قدرداني وکړه زیاته یې کړه: د اسلامي امارت د حاکمیت په لړ کې په بېلابېلو برخو په ځانګړې توګه د سوداګرۍ او پانګونې په برخه کې ګڼ شمېر فرصتونه برابر شوي او زموږ ټول هیوادوال د ژوند او مالي امنیت څخه برخمن دي.

دوی و ویل، په بهر کې مېشت افغانان چمتو دي چې خپل اقتصادي، علمي او ټولنیز ظرفیتونه او اسانتیاوې له اسلامي امارت سره شریکې کړي او د خپل هېواد لپاره د خدمت سرچینه شي.

د پیغام پای/