په کابل کې د ایرنا خبري اژانس د خبریال په وینا، د سرپرست حکومت مرستیال ویاند حمدالله فطرت د ازبکستان د ولسمشر د وروستیو څرګندونو هرکلی وکړ چې نړۍ باید د افغانستان له منزوي کولو څخه ډډه وکړي، او ویې ویل: «په دې وروستیو کې د سرپرست حکومت او ازبکستان ترمنځ اړیکې په سیاسي، اقتصادي، ټرانزیټ او نورو برخو کې پراخې شوې دي.»
هغه زیاته کړه: د افغانستان اسلامي امارت غواړي چې له ټولو ګاونډیو هېوادونو سره اړیکې پراخې کړي.
د ایرنا د راپور له مخې، د ازبکستان ولسمشر شوکت میرضیایف پرون په تاشکند کې د بین المجالس اتحادیې په ۱۵۰مه غونډه کې په خپله وینا کې له طالبانو سره د تعامل او خبرو اترو د دوام پر اړتیا ټینګار وکړ او له نړۍ یې وغوښتل چې افغانستان منزوي نه کړي. هغه زیاته کړه چې افغانستان باید د مرکزي آسیا سیمې یوه نه بېلېدونکې برخه وګڼل شي چې د پام وړ نااستعمال شوي سرچینې لري.
د پیغام پای/