په کابل کې د ایرنا خبري آژانس د خبریال له مخې، د افغانستان د سرپرست حکومت د بهرنیو چارو وزارت نن پنجشنبه د کب په ۳۰ مه په یوه خبرپاڼه کې اعلان وکړ چې د افغانستان اسلامي امارت نن د یوه بشردوستانه اقدام په توګه يوتن امریکایي اسیر جورج ګلیزمن له بند څخه ازاد کړ.
خبرپاڼه زیاتوي: د افغانستان اسلامي امارت د تل په څېر یو ځل بیا په ډاګه کوي، چې د خبرو، تفاهم او دیپلوماسۍ له لارې د ټولو مسایلو د حل لپاره لارې چاري پیدا کېدلای شي او د یاد امریکايي تبعه د خوشې کولو ګام هم د ښه نیت له مخې پورته شو چې دا ښيي ټولو لوریو سره، په ځانګړې توګه د امریکا متحده ایالتونو سره، د متقابل درناوي او ګټو پر بنسټ واقعي تعامل ته چمتو دی.
په خبرپاڼه کې راغلي، داچي افغانستان کي جنګ ختم شوی د داعش په څیر فتنه ګري ډلي ځپل شویې او له افغانستان څخه هیچا ته خطر نه دی متوجه دا ښیې چي افغانستان د سیمي او نړۍ په ثبات کي مثبت رول لوبولای شي او هم له نړیوالو سره خپل مسایل په ښه ډول حل کولای شي.
د بهرنیو چارو وزارت د متحده عربي اماراتو او قطر له حکومتونو مننه کړې چې د اسلامي امارت او امریکا ترمنځ د مسئلې د هواري په برخه کې یې اغیزمن رول لوبولی دی.
د پیغام پای/
Your Comment