په کابل کې د ایرنا خبري آژانس د خبریال له مخې، د افغانستان د سرپرست حکومت د مرکزي بانک چارواکو نن یکشنبه د ۵ مه په یوه خبرپاڼه کې ویلي، ازبکستان ته د افغانستان اسلامي امارت د لوړ پوړي پلاوي د سفر په ترڅ کې د افغانستان بانک رئیس، نور احمد آغا د ازبکستان د مرکزي بانک له رئیس تیمور اشمتوف سره ځانګړې لیدنه وکړه.
په دې لیدنه کې دواړو لوریو د دوه اړخیزو همکاریو د پراختیا، د بانکي لیږدونو په برخه کې د اسانتیاوو رامنځته کولو، د ظرفیت لوړونې، په سوداګریزو راکړو ورکړو کې د دواړو هېوادونو د ملي پولي واحدونو پر کارونې او د اداینزو سیستمونو د نښلونې او پراختیا په اړه مفصل بحثونه وکړل.
نور احمد آغا د هېوادونو تر منځ د بانکي اړیکو پراختیا ګټوره یاده کړه او ویې ویل چې د ازبکستان هېواد سره د بانکوالۍ برخې پراختیا کولای شي د سوداګریزو اړیکو د لا غوړېدو سبب شي.
هغه زیاته کړه، د افغانستان بانک ژمن دی چې د نړۍ له ټولو هېوادونو سره د بانکي سکتور په برخه کې رغنډه اړیکې ولري او په دې وسیله د افغانستان د بانکي سکتور په برخه کې په ملي او نړیواله کچه اړینې آسانتیاوې رامنځته کړي.
د ازبکستان هېواد د مرکزي بانک رئیس تیمور اشمتوف هم له خپله اړخه د پوره همکارۍ ډاډ ورکړ، نوموړي د دواړو هېوادونو تر منځ د سوداګرۍ د پراختیا په برخه کې د بانکي سکتور رول د خورا ارزښت وړ یاد کړ او په دې برخه کې یې دوه اړخیزه همکاري مهمه وبلله.
د ایرنا د خبر له مخې، ازبکستان هېواد ته د افغانستان اسلامي امارت د لوړ پوړي پلاوي د سفر موخه د افغانستان او ازبکستان ترمنځ د سیاسي، اقتصادي، سوداګریزو او ترانزیتي اړیکو پراختیا او په افغانستان کې په بېلابېلو سکتورونو کې د ازبکستاني بانګوالو د پانګونې جذب دی.
د پیغام پای/
Your Comment