کابل کې د ایرنا خبري آژانس د خبریال په خبره؛ د افغانستان د سرپرست دولت اقتصادي مرستیال دفتر نن دوشنبې د چنګاښ ۴ مه د یوې خبرپاڼې په خپرولو سره د سویلي افریقا د روغتیا او کانونو یو شمېر پانګوالو او کارپوهانو سره د ملا عبدالغني برادر د لیدنې خبر ورکړی دی.
په دغه لیدنه کې د سویلي افریقا د روغتیا او کانونو یو شمېر پانګوالو او کارپوهانو په افغانستان کې د پانګونې لپاره د رامنځ ته شوي فرصت ته په کتو د کانونو به برخه کې پانګونې ته لېوالتیا وښوده او زیاته یې کړه چې په پرمختللې ټیکنالوژۍ سره به د کانونو د استخراج لپاره لاس په کار شي.
دغه راز د دغه هېواد د روغتيايي برخې کارپوهان وايي، چې غواړي د افغانستان د عامې روغتيا له وزارت سره په همغږۍ يو معياري او مجهز روغتون جوړ کړي، څو په افغانستان کې د روغتيايي سکټور ملاتړ وشي او خلکو ته ښه روغتيايي خدمات وړاندې شي.
د سرپرست دولت اقتصادي مرستیال ملا عبدالغني برادر اخند هم په دې ناسته کې د سویلي افریقا پانګوالو، پوهانو او د روغتیا په برخه کې کارپوهانو ته وویل، چې د دوی د پانګونې لپاره به د هر ډول همکارۍ او ملاتړ ضمانت وکړي.
د برادر په وينا، اوسمهال په افغانستان کې د پانګونې لپاره ښه زمينه برابره ده او ټول کورني او بهرني پانګه وال کولاى شي له دې فرصت څخه ګټه پورته کړي.
د پیغام پای/
Your Comment