کابل کې د ایرنا خبري آژانس د خبریال په خبره؛ د افغانستان د سرپرست دولت د اقتصادي معاونیت دفتر نن سه شنبې د غوايي ۲۵ مه په یوه خبرپاڼه کې د بغلان ولایت د علماوو شورا له غړو سره د اقتصادي مرستیال ملا عبدالغني برادر د لیدنې خبر ورکړی دی.
خبرپاڼې زیاته کړې، په دغه لیدنه کې د بغلان ولایت د علماوو شورا رییس په هېواد کې د اسلامي نظام له حاکمیت، سرتاسري امنیت، په بېلا بېلو برخو کې د اسلامي امارت د لاس ته راوڼو او له خلکو سره د مسوولینو ښه چلند څخه خوښي وښوده.
دغه راز نوموړي د وروستیو سېلاب ځپلو سره د اسلامي امارت د خواخوږۍ، په وخت مرستو او د هغویو ستونزو ته پر وخت رسېدنې له امله مننه وکړه او ډاډ یې ورکړ، چې د بغلان خلک د اسلامي امارت تر څنګ ولاړ دي.
ملابرادر هم و ویل: چې د بغلان ولایت اوسېدونکو د سېلابونو له امله زیات ځاني او مالي زیانونه اوښتي دي.
د سرپرست دولت دغه چارواکي و ویل: بغلان ته زموږ د راتګ هدف یوازز خواخوږي ښودل نه بلکې دا مو مسوولیت دی، چې په سختو شرایطو کې د خپل ملت مرسته وکړو، موږ د افغانستان واکمنان نه، بلکې د خپل ملت خادمان یو.
د سرپرست دولت اقتصادي مرستيال وويل: له يوې خوا موږ له دې غمجنې پېښې سره مخ شوي يو، له بلې خوا د بغلان د خلکو ترمنځ مينه، يووالى، مرسته او همکاري مې وليده، چې وياړم.
د ایرنا د خبر له مخې په بغلان ولایت کې د جمعې د ورځې د سختو سېلابونو په پایله کې له ۳۰۰ زیات کسان مړه او ژوبل شول او په زرګونو جریبه کرنیزه ځمکه او د استوګنې کورونه ویجاړ شول.
د پیغام پای/