په کابل کې د ایرنا خبري آژانس د خبریال له مخي، د افغانستان د اطلاعاتو او کلتور وزارت چارواکو نن شنبه د لیندۍ په ۱۰ مه په یوه خبرپاڼه کې اعلان وکړ چې د دغه وزارت د پراختیايي بودجې څخه د ۴،۶ میلیونه افغانیو په ارزښت د ملي آرشیف د اساسي ترمیم چارې پیل شوې دي.
د اطلاعاتو او فرهنګ وزارت د اطلاعاتو او فرهنګ وزير مرستيال عتيق الله عزيزي د دغې پروژې د پرانستلو په مراسمو کې وويل: د ملي آرشيف د ودانۍ ساتنه مهمه ده ځکه دغه ودانۍ د هېواد له تاريخي ابداتو څخه ګڼل کېږي.
د عزیزي په وینا، د دغې ودانۍ په پياوړتيا او رغولو سره به د ملي آرشيف لاندې بنسټ او تاريخي اسناد د هوا او نورو شرايطو له امله له طبيعي زيانونو څخه خوندي شي. ټاکل شوې چې د دغې پروژې کار په شپږو میاشتو کې بشپړ شي.
د پیغام پای/