په کابل کې د ايرنا خبري اژانس د راپور له مخې، د اف چین شرکت وياند امرالدين عليزي نن د لړم په ٢٧مه نېټه وويل چې امو دریا نفتي حوزه کې د ۱۸ نویو استخراجي څاه ګانو د کیندلو چارې پیل شوې، چې په قشقري بلاک، د سرپل اق دریا او د جوزجان په زمردسای کې موقعیت لري.
هغه زياته کړه: د کیندنې چارې به یې په ۲۰۲۵ زیږدیز کال کې پای ته ورسېږي او د نفتو استخراج به ورسره د پام وړ زیات شي.
د ایرنا د راپور له مخې، د اف چین یا د افغانستان-چین په نوم د چینایي شرکت ترمنځ د ١٤٠١ کال د مرغومی په ١٥ نیټه د تیلو د استخراج یو لوی تړون لاسلیک شو.
د دغه قرارداد له مخې به د امو سیند د نفتي حوزې له ۴۵۰۰ کیلومتره مربع مساحت څخه چې د سرپل، جوزجان او فاریاب په ولایتونو کې موقعیت لري، تېل استخراجېږي.
د دغه قرارداد پر بنسټ به د امو سیند له سیمې څخه یو زره ټنه او بیا تر شل زره ټنه پورې تېل د دغه چینايي شرکت له خوا استخراج شي.
اوس مهال د امو سیند له نفتو څخه څه باندې درې زره ټنه تېل ایستل کېږي.
د پیغام پای/