د ایرنا په وینا، د ایران ولسمشر ډاکټر مسعود پزشکیان د ملګرو ملتو د ۷۹مې عمومي غونډې کې د خپلې وینا په پیل کې د دغه هیواد د پخواني ولسمشر شهید ابراهیم رئیسي یاد ته درناوی وکړ.
د ایران د ولسمشر د وینا مهمو ټکي په لاندې ډول دي:
- زه اراده لرم چې د خپل هیواد لپاره قوي بنسټونه رامینځته کړم ترڅو نوي عصر ته ننوځي او د نړۍ په رامینځته شوي سیسټم کې رغنده او مؤثر رول ولوبوي، خنډونه او ننګونې لیرې کړم او د خپل هیواد اړیکې د نړۍ د نن ورځې اړتیاو او واقعیتونو سره سم تنظیم کړم.
- د نړۍ خلکو په تیر کال کې د اسرائیلو د رژیم څرنګوالی لیدلی دی؛ دوی لیدلي چې د دغه رژیم مشران څنګه جنایتونه کوي او په ۱۱ میاشتو کې یې په غزه کې تر ۴۱ زرو زیات بې ګناه خلک وژلي چې زیاتره یې ښځې او ماشومان دي، خو نسل وژنه، د ماشومانو وژنې، جنګي جنایتونه او دولتي ترهګري د «مشروع دفاع» په نوم یادیږي! روغتونونه، وړکتونونه او ښوونځي «مشروع نظامي اهداف» بلل کیږي.
- د نړۍ په لويديځ او ختيځ کې د خپلو نسل وژنې په وړاندې د آزادۍ مينه وال او زړور خلک د «یهود ستیز» په نامه ياد کوي.
- دا اسراییل دی چې زموږ په خاوره کې یې زموږ ساینس پوهان، ډیپلوماتان او مېلمانه ووژل او په پټه او ښکاره یې د داعش او ترهګرو ډلو ملاتړ وکړ؛ له بلې خوا ایران د ازادو او ولسی غورځنګونو ملاتړ کړی چې له څلورو نسلونو راهیسې د اسرائیلو د رژیم د جنایتونو او استعمار قربانیان دی.
- موږ ستاسو د هغو هېوادونو له خلکو سره ولاړ یو، چې د اسراییلو د کړنو پر وړاندې په سرکونو کې لاریون کوي او د بشریت ضد جنایت غندو.
- نړیواله ټولنه باید ژر تر ژره تاوتریخوالی ودروي او ژر تر ژره دایمي اوربند رامنځ ته کړي او په لبنان کې د اسرایلو د لیوني وحشت مخه ونیسي مخکې له دې چې سیمه او نړۍ په اور کې واچوي.
- اسراييلي رژيم په غزه کې ناکامه شوی او نه شي کولای په جنايتونو او وحشتونو او د جګړې د پراخولو په هڅو سره خپل د نه ماتېدونکې افسانه بيا جوړه کړي.
- په لوېدیځه اسیا او نړۍ کې د ۷۰ کلنې ناامنۍ د پای ته رسولو یوازینۍ لار د فلسطین د خلکو د خپلواکۍ د حق بېرته ترلاسه کول دي.
- ايران هيڅکله جګړه نه ده پيل کړې او يوازې يې د نورو د يرغل په مقابل کې په مېړانه دفاع کړې او يرغلګر يې پښيمانه کړي دي!
- ایران د کوم ملت خاوره نه ده اشغال کړې؛ ده د کوم هیواد منابعو ته نه دي کتلي؛ او څو ځله یې په سیمه کې د تلپاتې سولې او ثبات د رامنځته کولو لپاره ګاونډیانو او نړیوالو فورمونو ته بېلابېل پلانونه وړاندیز کړي دي.
-موږ د سیمې د یووالي او د یوې «پیاوړې سیمې» د جوړولو د اړتیا په اړه خبرې کړې دي. «متحده او قوي سیمه» په څو اصولو ولاړه ده:
لومړی، راځئ دا ومنو چې موږ ګاونډیان یو او د ګاونډیتوب څخه مننه، موږ به تل یوځای پاتې شو. په سیمه کې د بهرنیو قدرتونو شتون موقتي او د بې ثباتۍ سرچینه ده. دوهم، د سیمې نوی نظم باید هراړخیز وي او د ټولو ګاونډیانو په ګټه وي. درېیم، ګاونډیان او وروڼه هېوادونه باید خپل قیمتي منابع د تخریبي رقابت او وسلو په سیالۍ کې ضایع نه کړي.
- زه د داسې هېواد ولسمشر یم چې په خپل معاصر تاریخ کې څو ځله له ګواښونو، جګړې، اشغال او بندیزونو سره مخ شوی دی. نور هيڅکله زموږ مرستې ته نه دي راغلي، زموږ د بې طرفۍ اعلاميې له پامه غورځولي او حتی د يرغلګر مرستې ته راغلي دي. موږ د تجربې څخه دا زده کړل چې موږ یوازې په خپلو خلکو او داخلي وړتیاوو تکیه کولی شو.
- د ایران اسلامي جمهوریت هوډ لري چې د خپل ځان امنیت تامین او تضمین کړي، نه د نورو لپاره ناامني.
- موږ د ټولو لپاره سوله غواړو او له هیچا سره جګړه نه غواړو.
- موږ د اوکراین او روسیې د خلکو لپاره تلپاتې سوله او امنیت غواړو. د ایران اسلامی جمهوریت په داسې حال کې چې له جنګ سره مخالف دی او په اوکراین کې د پوځی شخړې د چټک بندولو په ضرورت ټینګار کوی، د هرډول سوله ایز حل ملاتړ کوی او باور لری چې دغه کړکیچ یوازې د خبرو اترو له لارې ختمیدی شی.
- له برجام څخه د ټرامپ یو اړخیزه وتل په سیاسي ډګر کې د ګواښ پر بنسټ نظر او په اقتصادي ډګر کې د ځواک متمرکز نظر وښود.
- کله چې ایران د اټومي انرژۍ د نړیوالې ادارې لخوا تصدیق شوي چي په برجام کې په خپلو ټولو ژمنو عمل وکړ نو د ایران د ملت پروړاندې د اعظمي فشار تګلاره وکارول شوه.
- موږ چمتو یو چې د برجام غړو سره اړیکه ونیسو. که د برجام مکلفیتونه په بشپړ ډول او په ښه نیت سره پلي شي، موږ کولی شو د نورو مسلو په اړه خبرو اترو ته ورسیږو.
- دا ایران نه دی چې ستاسو پر هیواد یې بندیزونه لګولي او له نړۍ سره یې ستاسو د سوداګریزو اړیکو مخه نیولې ده. دا ایران نه دی چې تاسو ته د درملو د لاسرسي مخه نیسي. دا ایران نه دی چې د نړۍ بانکي او پولي سیستم ته مو د لاسرسي مخه نیولې ده. موږ هغه نه یو چې ستاسو د پوځ مشران مو وژلي دي، بلکې امریکا د بغداد په هوايي ډګر کې د ایران تر ټولو ګران پوځي قومندان وواژه.
- زما پیغام ټولو هغو دولتونو ته چې د ایران په وړاندې یې غیر رغنده تګلاره غوره کړې ده، له تاریخ څخه زده کړه وکړئ. موږ کولی شو دا محدودیتونه لرې کړو او یو نوی دور پیل کړو. دا نوی دوره د ایران د امنیتي اندیښنو په پیژندلو او د ګډو مسلو په اړه د ګډ کار سره پیل کیږي. حیاتي درملو ته له لاسرسي څخه محرومول نه یوازې د بشري حقونو ښکاره سرغړونه ده، بلکې د بشریت ضد جرم دی.
- په تېرو کلونو کې زموږ ملت د بنديزونو له امله د ډېرو سختيو په زغملو سره وښودله چې د ظلم پر وړاندې ولاړ دى.
- بندیزونو موږ یو پیاوړی ملت جوړ کړی، د قوي ارادې او ځان باور سره.
- ایران چمتو دی چې د یوې ښې نړۍ د جوړولو لپاره د نړۍ له قدرتونو او ګاونډیانو سره ګټورې او مساوي اقتصادي، ټولنیزې، سیاسي او امنیتي اړیکې ولري. د ایران د دغه ډول پیغام په وړاندې مناسب ځواب د نورو بندیزونو لګول نه دی.
د پیغام پای/