د ایرنا د خبر له مخې د نړۍ د کاتولیکانو مشر پاپ فرانسیس نن دوشنبې د وري ۱۳ مه د پاک عید په مناسبت په خپل پیغام کې ویلي، د بشریت لاره د جنګ په کاڼو انساني ناورین، د بشري حقونو سرغړونه او انساني قاچاق بنده شوې ده.
هغه اعلان وکړ چې د بشریت د ژغورنې لاره د نجات ورکوونکي راتګ دی او ویې ویل: موږ د جګړې په پیلولو سره د ژغورونکي د راتګ لاره بنده کړې ده.
د نړۍ د کاتولیکانو مشر د اوکراین او د اشغال شوې فلسطیني سیمو د جګړې له ښکیلو غاړو څخه د نړیوالو قوانینو د درناوي غوښتنه وکړه او هیله یې څرګنده کړه چې ټول جنګي بندیان به خوشې شي.
پاپ فرانسیس هم په غزه کې د سمدستي اوربند، د بندیانو د تبادلې او د غزې د خلکو بشري مرستو ته د لاسرسي غوښتنه وکړه.
د نړۍ د کاتولیکانو مشر ملکي وګړي په ځانګړې توګه ماشومان د نړۍ په بېلابېلو سیمو کې د جګړې اصلي قربانیان وبلل او په نړۍ کې یې د دښمنۍ د پای ته رسېدو دعا وکړه.
پاپ په سوريه، لبنان، هايتي، ميانمار، افريقايي هېوادونو او همدارنګه د اذربايجان او ارمنستان په سرحدي سيمو کې د سولې او ثبات د ټينګښت هيله څرګنده کړه.
د ایرنا د خبر له مخې د ملګرو ملتو د امنیت شورا د پابندۍ د پریکړه لیک له تصویبېدو او په غزې کې د اوربند د ټینګولو او د دغې سیمې د خلکو لپاره د بشردوستانه مرستو د برابرولو لپاره د نړیوالې ټولنې له غوښتنې سره سره، صهیونیست رژیم په دې سیمه کې بمباریو او وژلو ته دوام ورکړی دی.
د پیغام پای/