کابل کې د ایرنا خبري آژانس د خبریال په خبره؛ د افغانستان د سرپرست دولت ارګ نن سه شنبې د چنګاښ ۵ مه د یو شمېر ولایتونو له علماوو، قومي مشرانو او مخورو سره د سیاسي مرستیال مولوي عبدالکبیر د لیدنې خبر ورکړی دی.
په دې ناستو کې له بېلابېلو ولایتونو څخه راغلو مشرانو او علماوو د سیمه ییزې حکومتوالۍ او پرمختګ په اړه خپل نظریات او وړاندیزونه له سیاسي مرستیال سره شریک کړل.
دوی د سیمه ییزو او نړیوالو مسایلو په اړه د اسلامي امارت د دریځ د ملاتړ په ترڅ کې وویل، چې د افغان حکومت متحد او څرګند نظر د ملي ګټو لپاره ګټور دی.
په دې ناسته کې علماوو او مخورو له دولتي ادارو سره د خلکو د همکارۍ د پراختیا په موخه خپل وړاندیزونه شریک کړل.
مولوي عبدالکبیر هم په دې غونډه کې وویل چې د اسلامي امارت تګلاره د ملي ګټو او د افغانستان د خلکو د هیلو په اساس تصویب او تطبیقیږي.
سیاسي مرستیال د باثباته او پرمختللي نظام د رامنځته کېدو لپاره د خلکو همکاري اړینه وګڼله زیاته یې کړه چې افغان حکومت د خلکو مشورو ته ارزښت ورکوي.
د پیغام پای/
Your Comment