کابل کې د ایرنا خبري آژانس د خبریال په خبره؛ د افغانستان د سرپرست دولت لوړ پوړي غړي انس حقاني کابل کې د ایران اسلامي جمهورریت سفارت کې د ایران اسلامي جمهوریت د مرحوم ولسمشر آیت الله سید ابراهیم رییسي د خاطرو په کتاب کې لاسلیک وکړ.
هغه د ایران د ولسمشر او د هغه د ملګرو د روح لپاره د فاتحې په کولو سره زیاته کړه: د دغې پېښې له امله د ایران خلکو ته د تسلیت مراتب وړاندې کوم او د افغانستان خلک په دې غم کې د ایران له خلکو سره شریک دي.
حقاني د ایران اسلامي جمهوریت د مرحوم ولسمشر درې کلن تاریخ ته په اشارې سره هغه یو «سوله غوښتونکی» شخصیت وباله او ویې ویل: هغه ستونزې چې له پخوا څخه د اسلامي هېوادونو په منځ کې موجودې وې، د ایت الله رییسي د واکمنۍ پر مهال پای ته ورسېدې او هېوادونه سولې او تفاهم ته ورسېدل.
د افغانستان د سرپرست دولت دغه لوړپوړي غړي د ایران له اسلامي جمهوریت سره د سرپرست دولت اړیکې ښې وبللې ویې ویل: د ایران له اسلامي جمهوریت سره د افغانستان سیاسي او اقتصادي اړیکې تر بل هر هېواد زیاتې دي.
په کابل کې د ایران اسلامی جمهوریت د سفارت مرستیال سید حسن مرتضوی وویل: ایت الله رییسی له مختلفو هېوادونو په تېره بیا له افغانستان سره د ښو اړیکو د ټینګولو لپاره ډېره هڅه وکړه او په دې کار کې بریالی شو او دښمنانو چې هر څومره هڅه وکړه، ویې نه شوای کولی د افغانستان او ایران ترمنځ اړیکې خرابې کړي.
https://www.iribnews.ir/00Hnzx
د پیغام پای/
Your Comment