کابل کې د ایرنا خبري آژانس د خبریال په خبره؛ د افغانستان د سرپرست دولت رییس الوزرا ملا محمد حسن آخند نن دوشنبې د غوايي ۳۱ مه په یوه پیغام کې ویلي: په خواشینۍ سره مو خبر تر لاسه کړه، چې د ایران اسلامي جمهوریت ولسمشر آیت الله سید ابراهیم رئیسي، د بهرنیو چارو وزیر حسین امیرعبداللهیان، د تبریز د جمع امام حجته الاسلام سید علي آل هاشم او ورسره پلاوي د یوې چورلکې د لوېدو په پېښه کې ژوند له لاسه ورکړی دی.
رییس الوزرا وویل: د افغانستان اسلامي امارت او ټول افغانان په دې غمجنه پېښه ژور خفه او خواشیني دي.
نوموړي زیاته کړې، په دې غم کې د ایران له اسلامی جمهوریت او د دغه هېواد له خلکو سره شریک یو او د قربانیانو کورنیو، د ایران ملت او حکومت ته د تسلیت مراتب وړاندې کوو.
ملا محمد حسن اخند څرګنده کړې: موږ په دې سختو حالاتو کې د ایران له خلکو سره یوو او د دغې پېښې ټولو قربانیانو ته د مغفرت او د هغوی کورنیو ته د جمیل صبر دعا کوو.
د پیغام پای/